—獻給二二八的神魂
寒流抵才過去
寒流總是會過去
四界有燈火加咱照路
在更較暗的時瞬
咱也知也天總是會光
天光的時瞬
咱會當看著你等流血流汗
奉獻生命 給咱台灣的土地
發到真青翠的大叢樹仔
開到真艷的各種花蕊
過去無疑誤天要光的時
遂變成黑天暗地
過去無想著隔腹的親戚
哪會青面獠牙
你等的苦難就是台灣的苦難
總是 苦難的時代已經過去
你等的生命已經和台灣結成一体
你等的血汗變成甘露水
灌溉台灣豐沛的收成
你等奉獻的生命
創造台灣勇敢輝煌的歷史
因為有你等行過的路
台灣人的子孫
頭殼才會當舉到高高高
因為有你等流過的血
台灣人的子孫
胛脊骨才有法度激到挺挺挺
我唸這首詩奉獻給你等
因為你等已經將你等的生命
奉獻給咱台灣
#1268
